Пераезд сайта на новы хостынг: як перанесці без прастою
Прычыны змяніць хостынг бываюць розныя: павольны сервер, нязручная панэль, рост цэн, частыя збоі ці проста жаданне перавезці сайт бліжэй да кліентаў. Сам пераезд займае некалькі гадзін, але без плана можна страціць пошту, заяўкі ці нават частку файлаў. Вось як перанесці сайт спакойна і без прастою.
Перад пераездам
Спачатку высветліце, што менавіта ў вас ёсць на старым хостынгу: файлы сайта, база даных, пошта на дамене, крон-заданні, SSL-сертыфікат, асаблівыя налады сервера. Пра апошнія часта забываюць: модулі PHP, ліміты памяці, правілы перанакіравання. Праверце, што на новым серверы стаіць тая ж ці больш новая версія PHP і базы даных, сумяшчальная з вашым сайтам.
Поўная рэзервовая копія
Зрабіце свежую копію файлаў і базы і захавайце яе ў некалькіх месцах. Нават калі пераезд пойдзе ідэальна, гэтая копія — ваша страхоўка. Пераканайцеся, што архіў адкрываецца, а дамп базы не абрэзаны: вялікія базы часам экспартуюцца не цалкам праз вэб-інтэрфейс.
Тэставы запуск на новым серверы
Разгарніце сайт на новым серверы і праверце яго да таго, як змяняць DNS. Для гэтага можна прапісаць новы IP у файле hosts на сваім камп'ютары — тады вы ўбачыце сайт з новага сервера, а наведвальнікі па-ранейшаму будуць на старым. Прайдзіцеся па галоўных старонках, праверце формы, адмінку, пошук, загрузку файлаў і адпраўку лістоў.
Пошта на дамене
Калі пошта на дамене працуе праз стары хостынг, яе пераезд трэба спланаваць асобна. Перанясіце паштовыя скрыні, праверце MX-запісы і абнавіце SPF і DKIM, каб лісты з сайта і з пошты не трапілі ў спам. Самы просты варыянт — вынесці пошту ў асобны паштовы сэрвіс, тады пераезд сайта на яе не ўплывае.
Пераключэнне DNS
За дзень-два да пераезду паменшыце TTL DNS-запісаў, каб змены разышліся хутчэй. Перад пераключэннем спыніце змены на старым сайце, асабліва калі гэта інтэрнэт-крама: зрабіце апошнюю копію базы, перанясіце яе і толькі потым змяняйце A-запіс. Пасля абнаўлення DNS пэўны час частка наведвальнікаў яшчэ можа трапляць на стары сервер, таму не выключайце яго адразу.
Пасля пераезду
Выпусціце SSL-сертыфікат на новым серверы і праверце, што сайт адкрываецца па https без папярэджанняў. Наладзьце рэзервовае капіраванне і маніторынг. Праз некалькі дзён паглядзіце ў Search Console, ці няма новых памылак, і параўнайце хуткасць загрузкі з тым, што было.
Тыповыя памылкі
- Пераключылі DNS, не праверыўшы сайт на новым серверы, і некалькі гадзін наведвальнікі бачылі памылку.
- Забыліся пра крон-заданні: перасталі адпраўляцца лісты, абнаўляцца курсы ці рабіцца бэкапы.
- Перанеслі базу раніцай, а заказы, якія прыйшлі ўдзень на стары сервер, страцілі.
- Выключылі стары хостынг у той жа дзень і страцілі пошту, якая яшчэ ішла на стары сервер.
Мы можам узяць пераезд на сябе: зробім поўную копію, разгорнем і праверым сайт на новым серверы і пераключым дамен без прастою. Падрабязней — на старонцы капіравання і пераносу сайта.
